தஞ்சையில் பெட்ரோல் நிலையத்தில் ஊழியரின் பணப் பையை திருட முயன்ற இளைஞருக்கு பொதுமக்கள் தர்ம அடி கொடுத்த காட்சிகள் சமூக வலைதளங்களில் வேகமாக பரவி வருகிறது.
சாந்த பிள்ளை கேட் பகுதியில் அமைந்துள்ள பெட்ரோல் நிலையத்தில் நேற்றிரவு இருசக்கர வாகனத்தில் வந்த மூன்று இளைஞர்கள், பெட்ரோல் நிரப்புவது போல் நடித்து ஊழியரின் பணப் பையை திருட முயன்றுள்ளனர்.
சுதாரித்து கொண்ட அந்த ஊழியர், அவர்களை பிடிக்க முயன்றார். இரண்டு பேர் இருசக்கர வாகனத்தில் தப்பிய நிலையில், ஒருவர் மட்டும் சிக்கிக் கொண்டார்.
அப்போது, பிடிபட்ட இளைஞர், ஊழியரை தாக்கியதாக கூறப்படுகிறது.
இதில் பெட்ரோல் நிலைய ஊழியர் மயக்கம் அடைந்த நிலையில், ஆத்திரம் அடைந்த பொதுமக்கள் பிடிப்பட்ட இளைஞருக்கு தர்ம அடி கொடுத்தனர்.
தகவலறிந்து வந்த மேற்கு போலீசார், பொதுமக்களிடம் இருந்து இளைஞரை மீட்டு விசாரணை மேற்கொண்டனர்.
பிடிபட்ட இளைஞர் மீது பெட்ரோல் நிலைய உரிமையாளர் புகார் அளிக்க மறுத்ததால், போலீசார் இளைஞரை எச்சரித்து அனுப்பி வைத்தனர்.