உலக கோப்பை கிரிக்கெட் தொடரின் 30-வது லீக் போட்டியில் பாகிஸ்தான் மற்றும் தென் ஆப்பிரிக்கா அணிகள் இன்று மோதுகின்றன.
இங்கிலாந்தில் நடைபெற்று வரும் 12-வது உலக கோப்பை கிரிக்கெட் தொடரில் தற்போது லீக் சுற்று போட்டிகள் நடைபெற்று வருகிறது. இதன் 30-வது லீக் போட்டியில், ஒரு நாள் போட்டி தரவரிசையில் 4-வது இடத்தில் உள்ள தென் ஆப்பிரிக்காவும், 6-வது இடத்தில் உள்ள பாகிஸ்தான் அணிகளும் இன்று பலப்பரீட்சை நடத்துகின்றன.
பாப் டு பிளிஸ்சிஸ் தலைமையிலான தென் ஆப்பிரிக்கா அணி நடப்பு உலக கோப்பையில் தொடர் தோல்விகளை சந்தித்து கடும் விமர்சனத்திற்கு உள்ளாகி வருகிறது. ஆஃப்கானிஸ்தான் அணியுடன் மட்டுமே வெற்று பெற்ற நிலையில், மற்ற போட்டிகளில் தோல்வியை சந்தித்தது. ஒரு போட்டி மழையால் ரத்தானது.
அதேபோல 5 போட்டிகளில் விளையாடியுள்ள பாகிஸ்தானும் ஒரு போட்டியில் மட்டுமே வெற்றி பெற்றது. 3 போட்டிகளில் தோல்வியடைந்த நிலையில் ஒரு போட்டி மழையால் ரத்தானது. இருவருக்கும் அடுத்த சுற்று வாய்ப்பு ஏறக்குறைய மங்கியுள்ள நிலையில், இனி வரும் போட்டிகளில் வெற்றி பெற தென் ஆப்பிரிக்கா – பாகிஸ்தான் அணிகள் தீவிரம் காட்டி வருகிறது. லண்டன் லார்ட்ஸ் மைதானத்தில் நடைபெறும் இப்போட்டி 3 மணிக்கு தொடங்குகிறது.