காரில் சென்றவர்களிடம் செயினை பறித்துச் சென்ற மர்ம நபர்கள் கைது

விழுப்புரம் மாவட்டம் திண்டிவனத்தில் வாகனங்களில் செல்பவர்களிடம் வழிப்பறியில் ஈடுபட்ட இரண்டு கொள்ளையர்கள் கைது செய்யப்பட்டனர்.

திருவண்ணாமலை அடுத்து வேங்கிகால் கிராமத்தில் வசித்து வரும் திருமுருகன் தனது குடும்பத்தினருடன் சென்னை சென்று விட்டு காரில் திண்டிவனம் நோக்கி வந்து கொண்டிருந்தார். தீவனூர் அடுத்த கொணக்கம்பட்டு என்ற இடத்தில் இருசக்கர வாகனத்தில் வந்த 2 மர்ம நபர்கள் காரை வழிமறித்து கத்தியைக் காட்டி மிரட்டி திருமுருகனின் மனைவி கழுத்தில் இருந்த 2 செயின்களை பறித்துச் சென்றுள்ளனர். இது குறித்து திருமுருகன் அளித்த புகாரின் பேரில், காவல்துறையினர் தனிப்படை அமைத்து கொள்ளையர்களை தேடி வந்தனர். இந்த நிலையில் திண்டிவனம்-செஞ்சி சாலையில் மக்களிடம் அத்துமீறி வழிப்பறியில் ஈடுபட்ட இருவரையும் கைது செய்த காவல்துறையினர், அவர்களிடமிருந்து 25 லட்ச ரூபாய் மதிப்பிலான நகைகள், இரு செல்போன்கள், இருசக்கர வாகனங்கள் உள்ளிட்டவற்றை பறிமுதல் செய்தனர். இதனை தொடர்ந்து கொள்ளையர்கள் கடலூர் மத்திய சிறையில் அடைக்கப்பட்டனர்.