இந்திய – ஆஸ்திரேலிய அணிகளுக்கு இடையிலான 5-வது ஒருநாள் கிரிக்கெட் போட்டி இன்று டெல்லியில் நடைபெறுகிறது.
5 போட்டிகள் கொண்ட தொடரில் இரு அணிகளும் தலா இரு போட்டிகளில் வென்று சம நிலையில் உள்ளன. கடந்த 2 ஆம் தேதி நடைபெற்ற முதல் போட்டியில் இந்தியா 6 விக்கெட் வித்தியாசத்தில் வென்றது. மார்ச் 5 ஆம் தேதி நடைபெற்ற இரண்டாவது ஒருநாள் போட்டியில் இந்திய அணி 8 ரன்கள் வித்தியாசத்தில் வெற்றி பெற்றது. இதைத் தொடர்ந்து மார்ச் 8 ஆம் தேதி நடைபெற்ற 3-வது போட்டியில் ஆஸ்திரேலியா அணி 32 ரன்கள் வித்தியாசத்தில் வென்றது.
கடந்த 10 ஆம் தேதி நடந்த 4 வது ஒருநாள் போட்டியில் ஆஸ்திரேலிய அணி 4 விக்கெட் வித்தியாசத்தில் அபார வெற்றி பெற்றது. இந்திய அணி நிர்ணயித்த 359 ரன்கள் இலக்கை ஆஸ்திரேலிய அணி வெற்றிகரமாக எட்டியது. இரு அணிகளும் சம பலத்துடன் உள்ள நிலையில் இன்று 5-வது மற்றும் இறுதி ஒருநாள் கிரிக்கெட் போட்டி டெல்லி பெரோசா கோட்லா மைதானத்தில் நடைபெற உள்ளது. பிற்பகல் 1.30 மணிக்கு போட்டி தொடங்குகிறது.
தொடரை வெல்ல இரு அணிகளும் கடுமையாக போராடும் என்பதால் ஆட்டத்தில் அனல் பறக்கும் என்று ரசிகர்கள் எதிர்பார்க்கிறார்கள்.