தமிழகத்தில் 122 பொறியியல், 155 பாலிடெக்னிக் கல்லூரிகளில் இடங்கள் குறைப்பு!!!!

மாணவர் சேர்க்கை 30 சதவீதமாக சரிந்த 122 பொறியியல் கல்லூரிகள் மற்றும் 155 பாலிடெக்னிக் கல்லூரிகளில் உள்ள இடங்கள் பாதியாகக் குறைக்கப்பட்டுள்ளன. தமிழகத்தில் 500-க்கும் மேற்பட்ட பொறியியல் கல்லூரிகள் உள்ளன. இதில், 100-க்கும் மேற்பட்ட கல்லூரிகளில் 10 சதவீத மாணவர்கள் மட்டுமே நடப்பு கல்வியாண்டில் சேர்ந்துள்ளனர். முதன்மைப் பாடப் பிரிவுகளான சிவில், மெக்கானிக்கல், கணினி அறிவியல் ஆகிய பிரிவுகளிலும் மாணவர் சேர்க்கை சரிந்துள்ளது. இதையடுத்து, மாணவர் சேர்க்கை 30 சதவீதத்திற்கும் கீழ் சரிந்த 122 பொறியியல் கல்லூரிகள் மற்றும் 155 பாலிடெக்னிக் கல்லூரிகளில் உள்ள இடங்கள் பாதியாகக் குறைத்து அகில இந்திய தொழில்நுட்பக் கல்வி கவுன்சில் அதிரடி உத்தரவு பிறப்பித்துள்ளது. 50 சதவீத இடங்களுக்கு மட்டுமே மாணவர்கள் சேர்க்கையை நடத்த வேண்டும் என்று தெரிவித்துள்ளது.