புதுச்சேரியில் சிகரெட் பிடித்ததை தட்டிகேட்ட வியாபாரிகளை 3 இளைஞர்கள் கத்தியால் வெட்டிய சம்பவம் பரபரப்பை ஏற்படுத்தியுள்ளது. இதுதொடர்பான சிசிடிவி காட்சிகள் தற்போது வெளியாகியுள்ளன.
புதுச்சேரி அருகே திருக்கனூர் பகுதியில் திருஞானம் என்பவர் பெட்டிக் கடை நடத்தி வருகிறார். இவரது கடையின் அருகே 3 இளைஞர்கள் சிகரெட் பிடித்துள்ளனர். இதனை கண்ட திருஞானம், இங்கு சிகரெட் பிடிக்க கூடாது என அறிவுறுத்தியுள்ளார். இதனால் அவருக்கும், 3 இளைஞர்களுக்கும் இடையே மோதல் ஏற்பட்டுள்ளது. அப்போது, ஒரு இளைஞர் தான் வைத்திருந்த கத்தியால் திருஞானத்தின் கையில் வெட்டியுள்ளார். இதனை தடுக்க வந்த திருஞானத்தின் சகோதரர் உமாபதி என்பவரையும் அந்த இளைஞர்கள் கத்தியால் தாக்கியுள்ளனர். தாக்குதலில் ஈடுபட்ட 3 இளைஞர்களையும் போலீசார் தேடி வருகின்றனர். தாக்குதல் சம்பவம் தொடர்பான சிசிடிவி காட்சிகள் தற்போது வெளியாகியுள்ளன.