தமிழகத்தில் எதற்கெல்லாம் தடை தொடரும்?

தமிழகத்தில் தளர்வுகளுடன் ஊரடங்கு நீட்டிக்கப்பட்டுள்ள நிலையில், கல்வி நிலையங்கள், திரையரங்குகள் இயங்க தடை விதிக்கப்பட்டுள்ளது.

தமிழகத்தில் பள்ளிகள், கல்லூரிகள், ஆராய்ச்சி நிறுவனங்கள் மற்றும் அனைத்துக் கல்வி நிறுவனங்கள் இணைய வழிக் கல்வி கற்றலை தொடர வேண்டும் என்று தெரிவிக்கப்பட்டுள்ளது.

திரையரங்குகள், நீச்சல் குளங்கள், பொழுதுபோக்கு பூங்காக்கள், பெரிய அரங்குகள், கூட்ட அரங்குகள், கடற்கரை, உயிரியல் பூங்காக்கள், அருங்காட்சியகங்கள், சுற்றுலாத் தலங்கள் போன்ற பொதுமக்கள் அதிகம் கூடும் இடங்களுக்கு தடை தொடரும் என்றும் அறிவிக்கப்பட்டுள்ளது.

மத்திய உள் துறை அமைச்சகத்தால் அனுமதிக்கப்பட்ட வழித் தடங்களைத் தவிர சர்வதேச விமான போக்குவரத்திற்கான தடை நீடிக்கும் என்றும்,

புறநகர் மின்சார ரயில் போக்குவரத்துக்கு இயங்க அனுமதி இல்லை என்றும் தெரிவிக்கப்பட்டுள்ளது.

மதம் சார்ந்த கூட்டங்கள், சமுதாய, அரசியல், பொழுதுபோக்கு, கலாச்சார நிகழ்வுகள், கல்வி விழாக்கள் மற்றும் ஊர்வலங்கள் நடத்த தடை தொடரும் என்றும்,

பொதுமக்கள் வெளியில் செல்லும்போதும், பொது இடங்களிலும் முககவசம் அணிவது கட்டாயமாக்கப்பட்டுள்ளது என்றும் குறிப்பிடப்பட்டுள்ளது.

பொதுமக்கள் சமூக இடைவெளியை தவறாமல் கடைபிடித்து, அரசுக்கு முழு ஒத்துழைப்பு நல்க வேண்டும் என்றும், பொதுமக்களின் ஒத்துழைப்பையும், நோய் தொற்றின் நிலையையும் கருத்தில் கொண்டு அவ்வப்போது தேவைக்கேற்ப மேலும் தளர்வுகள் வழங்கப்படும் எனவும் முதலமைச்சர் எடப்பாடி பழனிசாமி அறிவித்துள்ளார்.