விக்கிரவாண்டி, நாங்குநேரி தொகுதியில் இன்றுடன் பிரசாரம் நிறைவு

விக்கிரவாண்டி, நாங்குநேரி தொகுதி இடைத்தேர்தலுக்கான பிரசாரம் இன்று மாலை 6 மணியுடன் நிறைவடைகிறது.

வருகிற 21-ஆம் தேதி இரண்டு தொகுதிகளிலும் இடைத்தேர்தல் நடைபெறுகிறது. இடைத்தேர்தலை முன்னிட்டு முதலமைச்சரும் துணை முதலமைச்சரும் தீவிர வாக்கு சேகரிப்பில் ஈடுபட்டனர். இதேபோல் அமைச்சர்கள், எம்.எல்.ஏக்கள், கூட்டணிக் கட்சி நிர்வாகிகளும் சூறாவளி பிரசாரம் மேற்கொண்டனர். இந்த நிலையில், இரண்டு தொகுதிகளிலும் இன்று மாலை 6 மணியுடன் தேர்தல் பிரசாரம் ஓய்கிறது. நாளை மறுநாள் வாக்குப்பதிவு நடைபெறுகிறது. விக்கிரவாண்டியில் 225 வாக்குச்சாவடிகளும், நாங்குநேரியில் 299 வாக்குச்சாவடிகளும் அமைக்கப்பட்டுள்ளன. பதிவான வாக்குகள் வருகிற 24ஆம் தேதி எண்ணப்படுகின்றன. இதையொட்டி இரண்டு தொகுதிகளிலும் பலத்த பாதுகாப்பு ஏற்பாடுகள் செய்யப்பட்டுள்ளன