அமெரிக்க அதிபர் டொனால்டு டிரம்ப் வரும் 24 மற்றும் 25ம் தேதிகளில் இந்தியாவில் சுற்றுப்பயணம் மேற்கொள்ளவுள்ளதாக அதிகாரப்பூர்வமாக அறிவிக்கப்பட்டுள்ளது.
இதுதொடர்பாக அமெரிக்க அதிபர் மாளிகை தனது டிவிட்டர் பக்கத்தில் பதிவிட்டுள்ள செய்தியில், அமெரிக்க அதிபர் டொனால்டு டிரம்ப் வரும் 24 மற்றும் 25-ம் தேதிகளில் இந்தியாவில் சுற்றுப்பயணம் மேற்கொள்ள உள்ளதாகத் தெரிவிக்கப்பட்டுள்ளது.
இந்த சுற்றுப்பயணத்தின் போது, குடியரசுத் தலைவர் ராம்நாத்கோவிந்த், பிரதமர் மோடி ஆகியோரை சந்திக்கிறார். அப்போது, இரு நாட்டு உறவை மேலும் வலுப்படுத்துதல், ராணுவ ஆயுதக் கொள்முதல், பாதுகாப்பு உள்ளிட்ட துறைகளில் முக்கிய ஒப்பந்தங்கள் கையெழுத்தாகும் என எதிர்பார்க்கப்படுகிறது.
அகமதாபாத்தில் உள்ள காந்தி சபர்மதி ஆசிரமத்தை அவர் சுற்றிப்பார்க்கவுள்ளார். மேலும், அங்கு ஏற்பாடு செய்யப்பட்டுள்ள பிரமாண்ட கூட்டத்தில் பங்கேற்று பேசுகிறார். டொனால்டு டிரம்பின் மனைவி மெலானியா டிரம்பும் இந்திய சுற்றுப்பயணத்தில் பங்கேற்றுள்ளார் என்பது குறிப்பிடத்தக்கது.