மகாத்மா காந்தி நினைவிடத்தில் மரியாதை செலுத்திய அதிபர் டிரம்ப்

டெல்லியில் உள்ள மகாத்மா காந்தி நினைவிடத்தில் அமெரிக்க அதிபர் டொனால்ட் டிரம்ப் மலர் தூவி மரியாதை செலுத்தினார்.

டெல்லி ராஜ்காட்டில் உள்ள மகாத்மா காந்தி நினைவிடத்திற்கு அமெரிக்க அதிபர் டெனால்ட் டிரம்ப், அவரது மனைவி மெலானியாவுடன் சென்றார். மகாத்மா காந்தி நினைவிடத்தில் மலர்வளையம் வைத்த பிறகு டிரம்ப், மலர் தூவி மரியாதை செலுத்தினார்.

இதனை தொடர்ந்து, வருகை பதிவேட்டில் அவர் கையெழுத்திட்டார். பின்னர் பார்வையாளர்கள் புத்தகத்தில் அற்புதமான இந்தியா மற்றும் மகாத்மா காந்தியின் சிந்தனையோடு அமெரிக்க மக்கள் மிகுந்த மதிப்பு கொண்டுள்ளதாக குறிப்பிட்டார். மகாத்மா காந்தி நினைவிட வளாகத்தில் அதிபர் டிரம்ப், அவரது மனைவி மெலானியா ஆகியோர் மரக்கன்று ஒன்றை நட்டனர்.