நாடு முழுவதும் கடந்த மாதம் 5ஆம் தேதி நடைபெற்ற நீட் தேர்வின் முடிவுகள் இன்று வெளியிடப்படுகின்றன.
நாடு முழுவதும் அரசு, தனியார் மருத்துவக் கல்லூரிகளில் உள்ள எம்பிபிஎஸ், பிடிஎஸ் படிப்புகள் மற்றும் கால்நடை மருத்துவப் படிப்புகளுக்கு நீட் தேர்வு அடிப்படையில் மாணவர் சேர்க்கை நடத்தப்படுகிறது. இந்நிலையில் 2019-20 கல்வி ஆண்டு மாணவர் சேர்க்கைக்கான ‘நீட்’ தேர்வு நாடுமுழுவதும் கடுமையான சோதனைகள் மற்றும் கட்டுப்பாடுகளுடன் கடந்த மே மாதம் 5ம் தேதி நடைபெற்றது. ஃபானி புயலால் பாதிக்கப்பட்ட ஒடிசா மாநிலத்தில் மட்டும் நீட் தேர்வு ஒத்திவைக்கப்பட்டு 20-ம் தேதி நடத்தப்பட்டது.
இந்நிலையில், தமிழகத்தில் மட்டும் 14 நகரங்களில் உள்ள 188 மையங்களில் நீட் தேர்வு நடத்தப்பட்டது. நாடு முழுவதும் 154 நகரங்களில் 2,500க்கும் மேற்பட்ட மையங்களில் தமிழ், ஆங்கிலம், இந்தி என 11 மொழிகளில் தேர்வு நடைபெற்றது. நீட் தேர்வுக்கு தமிழகத்தின் 1 லட்சத்து 40 ஆயிரம் பேர் உட்பட நாடு முழுவதும் 15 லட்சத்து 19 ஆயிரத்து 375 பேர் விண்ணப்பித்திருந்தனர். இதில் 14 லட்சத்து 10 ஆயிரத்து 754 பேர் மட்டுமே தேர்வு எழுதினர்.
நீட் தேர்வு முடிவுகள் இன்று வெளியிடப்பட உள்ள நிலையில், முடிவுகளை அறிய www.nta.ac.in, மற்றும் www.ntaneet.nic.in ஆகிய இணையதளங்களில் காணலாம். இந்த ஆண்டு தமிழகம் உட்பட நாடுமுழுவதும் இந்திய மருத்துவ முறை படிப்புகளான ஆயுர்வேதா, யோகா மற்றும் இயற்கை மருத்துவம், சித்தா, ஹோமியோபதி, ஆயுஷ் படிப்புகளுக்கும் நீட் தேர்வு மதிப்பெண் அடிப்படையில் மாணவர் சேர்க்கை நடத்தப்படும் என்று மத்திய அரசு திட்டவட்டமாக அறிவித்துள்ளது.