திருவள்ளூர் அருகே வீட்டின் பூட்டை உடைத்து கொள்ளை முயற்சியில் ஈடுபட்ட திருடன், மூதாட்டியின் சாமர்த்தியத்தால் சிக்கியதையடுத்து, கம்பத்தில் கட்டி வைத்து சரமாரியாக தாக்கிய பொதுமக்கள், காவல் நிலையத்தில் ஓப்படைத்தனர். திருவள்ளூர் பகுதியில் நந்தகுமார் என்பவர் ஹார்டுவேர்ஸ் கடை நடத்தி வருகிறார். காலையில் வீட்டை பூட்டி விட்டு தனது தாயாருடன் கடைக்கு சென்றுள்ளார். இந்நிலையில், வீடு திரும்பிய தாய் லோகாம்பாள், வீட்டின் பூட்டு உடைக்கப்பட்டு கதவு திறந்திருப்பதைக் கண்டு அதிர்ச்சி அடைந்துள்ளார்.
பின்னர் உள்ளே சென்று பார்த்தபோது, வீட்டினுள் கொள்ளையடித்துக் கொண்டிருந்த மர்ம நபர் ஒருவர் தப்பியோட முயன்றுள்ளார். அப்போது சாமர்த்தியமாக செயல்பட்ட லோகாம்பாள், திருடனின் கையை பிடித்துக் கொண்டு மகன் நந்தகுமாருக்கு தகவல் கொடுத்துள்ளார். இதனால் பயந்து போன கொள்ளையன் லோகாம்பாளை கீழே தள்ளிவிட்டு ஓடியபோது, விரட்டி சென்று பிடித்த நந்தகுமார், திருடனை கம்பத்தில் கட்டி வைத்துள்ளார். இதையடுத்து அங்கு குவிந்த பொதுமக்கள், திருடனை சரமாரியாக தாக்கி, காவல்துறையினரிடம் ஒப்படைத்தனர்.