பாம்பன் ரயில் பாலத்தில் இன்று சோதனை ரயில் ஓட்டம்

பாம்பன் ரயில் பாலத்தில் மீண்டும் ரயில் போக்குவரத்து தொடங்குவதற்காக சோதனை ஓட்டம் இன்று நடைபெற உள்ளது.

ராமநாதபுரம் மாவட்டம், மண்டபம் – ராமேஸ்வரம் தீவுப் பகுதியை இணைக்கும் வகையில் உள்ள பாம்பன் ரயில் தூக்குப் பாலம், கடந்த டிசம்பர் மாதம் 4 ஆம் தேதி பழுதடைந்தது. இதையடுத்து, ராமேஸ்வரம் வரும் அனைத்து ரயில் சேவைகளும் நிறுத்தப்பட்டன. மேலும், இந்திய ரயில்வே தலைமை பொறியாளர்கள் மற்றும் உயர் அதிகாரிகள் ஆய்வு செய்து, சீரமைப்புப் பணிகளில் ஈடுபட்டு வந்தனர். பின்னர், கடந்த 3 நாட்களாக பாம்பன் தூக்குப் பாலத்தை திறந்து மூடும் சோதனைப் பணிகள் நடைபெற்று வந்தன. இந்நிலையில், பாம்பன் பாலம் வழியாக மீண்டும் ரயில் சேவையை இயக்குவது குறித்து, இன்று பயணிகள் இல்லாத ரயிலை இயக்கி சோதனை ஓட்டம் நடைபெற உள்ளது.