தமிழகம் முழுவதும் அரசு பள்ளிகளுக்கு இலவச பாட புத்தகங்களை அனுப்பி வைக்கும் பணி முழு வீச்சில் நடைபெற்று வருகிறது.
ஏப்ரல், மே மாதங்கள் தமிழக பள்ளிகளுக்கு கோடை விடுமுறை விடப்படுவது வழக்கம். அதன்படி இந்த ஆண்டுக்கான கோடை விடுமுறை வரும் ஜூன் 2ஆம் தேதியுடன் முடிகிறது. இதனையடுத்து தமிழகத்தில் உள்ள அரசு மற்றும் தனியார் பள்ளிகள் அனைத்தும் ஜூன் 3ஆம் தேதி திறக்கப்பட உள்ளன. இதனிடையே அரசு பள்ளிகள் திறக்கும் தினத்திலேயே மாணவர்களுக்கு வழங்குவதற்கு ஏதுவாக முன்கூட்டியே பாடப்புத்தகங்களை பள்ளிகளுக்கு அனுப்பிவைக்கும் பணியில் பள்ளிக்கல்வித்துறை முழுவீச்சில் ஈடுபட்டுள்ளது. அதன் ஒருபகுதியாக செஞ்சி அரசு பள்ளிக்கு இலவச பாடப்புத்தகங்கள் வந்து சேர்ந்துள்ளன. இதேபோல் மற்ற அரசு பள்ளிகளுக்கும் இலவச பாட புத்தகங்கள் அனுப்பிவைக்கப்பட்டு வருகின்றன.