வெலிங்டனில் இன்று நடைபெறும் டி20 கிரிக்கெட் போட்டியில் இந்தியா-நியூசிலாந்து அணிகள் பலப்பரீட்சை நடத்துகின்றன.
நியூசிலாந்தில் சுற்றுப் பயணம் மேற்கொண்டுள்ள இந்திய அணி ஏற்கனவே ஒருநாள் கிரிக்கெட் தொடரை 4-1 என்ற கணக்கில் வென்றுள்ளது. இந்நிலையில் இரு அணிகளும் மோதும் 3 போட்டிகளைக் கொண்ட டி20 கிரிக்கெட் தொடரின் முதல் ஆட்டம் இன்று நடைபெறுகிறது. வெலிங்டனில் இந்திய நேரப்படி நண்பகல் 12.30 மணிக்கு ஆட்டம் தொடங்க உள்ளது. ஏற்கனவே ஒருநாள் தொடரை இழந்த நியூசிலாந்து அணி டி20 தொடரை கைப்பற்ற வேண்டும் என்ற முனைப்புடன் களமிறங்குகிறது. அதேசமயம் டி20 கிரிக்கெட் தொடரையும் தன்வசப்படுத்தும் உத்வேகத்துடன் இந்திய அணி களமிறங்குவதால் இந்தப் போட்டி சுவாரஸ்யம் நிறைந்ததாக இருக்கும் என எதிர்பார்க்கப்படுகிறது. இதுவரை நியூசிலாந்து மண்ணில் நடைபெற்ற டி20 போட்டிகளில் இந்தியா வெற்றி பெற்றது இல்லை என்பது குறிப்பிடத்தக்கது.