சென்னை புளியந்தோப்பு பகுதியில் திருட்டில் ஈடுபடுவதற்கு இடையூறாக இருந்த கண்காணிப்பு காமிராக்களை அடித்து நொறுக்கிய திருடனை காவல்துறையினர் கைது செய்தனர்.
சென்னையில் குற்றச் சம்பவங்களை தடுக்கும் விதமாக மாநகர் முழுவதும் கண்காணிப்பு காமிராக்கள் பொருத்தப்பட்டு வருகின்றன. இந்தநிலையில் சமீபத்தில் புளியந்தோப்பு அம்பேத்கர் கல்லூரி சாலைப் பகுதியில் கண்காணிப்பு காமிராக்கள் சேதப்படுத்தப்பட்டிருந்தன. இதைப்பற்றி ரகசிய விசாரணை நடத்திய காவல்துறையினர் ஓட்டேரியைச் சேர்ந்த ராஜா என்பவரைக் கைது செய்தனர். அவரிடம் நடத்தப்பட்ட விசாரணையில் திருட்டில் ஈடுபட இடையூறாக இருந்ததால் கண்காணிப்பு காமிராக்களை சேதப்படுத்தியதை ஒப்புக் கொண்டார். இந்நிலையில் காவல்துறையினர் சுற்றி வளைத்த போது தப்பியோட முயன்று கீழே விழுந்ததில் ராஜாவின் கை முறிந்ததால் அவருக்கு முதலுதவி சிகிச்சை அளிக்கப்பட்டது.