மும்பையில் கனமழை காரணமாக பள்ளி கல்லூரிகளுக்கு இன்று விடுமுறை

மும்பையில் கனமழை பெய்யும் என்று வானிலை மையம் எச்சரித்து இருப்பதால், பள்ளி கல்லூரிகளுக்கு இன்று விடுமுறை அறிவிக்கப்பட்டுள்ளது. 

தென்மேற்கு பருவமழை நிறைவு பெறாத நிலையில் மும்பையில் பலத்த மழை பெய்து வருகிறது. புறநகர் பகுதிகளிலும் இடி மின்னலுடன் மழை கொட்டி வருகிறது. தொடர் மழை காரணமாக மும்பையில் இயல்பு வாழ்க்கை பாதிக்கப்பட்டுள்ளது. இருப்பு பாதைகளில் தண்ணீர் தேங்கி இருப்பதால், ரயில்கள் தாமதமாக இயக்கப்பட்டு வருகின்றன. வேலைக்கு செல்வோர் அவதிக்கு ஆளாகி வருகின்றனர்.

இந்தநிலையில், மும்பை மற்றும் அதன் புறநகர் பகுதிகளில் மழை நீடிக்கும் என்று வானிலை மையம் எச்சரித்துள்ளது. ஒரு சில பகுதிகளில் அதீத மழை பெய்யும் என்று எதிர்பார்ப்படுவதால், சிவப்பு எச்சரிக்கை விடுக்கப்பட்டுள்ளது. இதையடுத்து பள்ளி, கல்லூரிகளுக்கு இன்று விடுமுறை விடப்பட்டுள்ளது. தாழ்வான பகுதிகளில் வசிப்பவர்கள் பாதுகாப்பாக இருக்குமாறு அறிவுறுத்தப்பட்டுள்ளது.