சமூக வலைதளங்களில் வைரலாகும் ரோகித் சர்மாவின் ரியாக்‌ஷன்

இந்தியா – வங்கதேசம் அணிகள் இடையிலான முதலாவது 20 ஓவர் போட்டி தலைநகர் டெல்லியில் நேற்று நடைபெற்றது. முதலில் விளையாடிய இந்திய அணி, இருபது ஓவர் முடிவில் 6 விக்கெட் இழப்புக்கு 148 ரன்கள் குவித்தது. இதையடுத்து, 149 ரன்கள் எடுத்தால் வெற்றி என்ற இலக்குடன் களமிறங்கிய வங்கதேசம் அணி, 7 விக்கெட் வித்தியாசத்தில் வெற்றிப் பெற்றது. கடைசிவரை ஆட்டமிழக்காமல் இருந்த முஷ்பிகுர் ரஹீம் 60 ரன்கள் குவித்தார். இதன் மூலம் இந்தியாவுக்கு எதிராக முதல் முறையாக 20 ஓவர் போட்டியில் வங்கதேசம் அணி வெற்றி பெற்று சாதனை படைத்தது.

இந்நிலையில், வங்கதேச அணி பேட்டிங் செய்து கொண்டிருந்த போது, சஹால் வீசிய 10-வது ஓவரின் கடைசி பந்தை எதிர்கொண்ட செளமியா சர்க்கார், பந்தை அடிக்காமல் மிஸ் செய்தார். உடனே, விக்கெட் பணியில் ஈடுபட்டு கொண்டிருந்த ரிஷப் பண்ட், நடுவரைப் பார்த்து கேட்ச்சிற்கு அப்பீல் செய்தார். ஆனால், நடுவரோ அவுட் கொடுக்க மறுத்து விட்டார். இதனையடுத்து, கேப்டன் ரோகித் சர்மாவிடம் சென்று ரிவியூ கேட்கும்படி நம்பிக்கையுடன் ரிஷப் பண்ட் கூறியதால், ரோகித் உடனடியாக கையை மேலே உயர்த்தி ரிவியூ கேட்டார்.

இதனைத் தொடர்ந்து, review-ல் பார்த்த பிறகு தான், பந்து பேட்டில் படாதது நன்றாக தெரியவரவே, இந்திய அணி ரிவியூ கேட்கும் வாய்ப்பு இழந்தது. அப்போது, கேப்டன் ரோகித் சர்மா கொடுத்த ரியாக்‌ஷன் சமூக வலைதளங்களில் வைரலாகி வருகிறது. உன்னையெல்லாம் வைத்து என்னதான் பண்றது என்று ரிஷப் பந்தை பார்த்து கேட்கிற மாதிரி, தன் தலையில் அடித்துக்கொண்டு சிரித்தப்படியே ரோகித் நடந்து சென்றார்.