வேலூர் மாவட்டத்தை மூன்றாக பிரிக்க முதலமைச்சரிடம் கோரிக்கை

வேலூர் மாவட்டத்தை மூன்றாக பிரிக்க வேண்டும் என முதலமைச்சரிடம் கோரிக்கை விடுத்துள்ளதாக வணிக வரித்துறை அமைச்சர் கே.சி. வீரமணி தெரிவித்துள்ளார்.

வேலூர் புதிய பேருந்து நிலையத்தில் 8 புதிய பேருந்துகளை வணிக வரித்துறை அமைச்சர் கே.சி.வீரமணி, மாவட்ட ஆட்சியர் ராமன் ஆகியோர் கொடி அசைத்து துவக்கி வைத்தனர்.

பின்னர் செய்தியாளர்களுக்கு பேட்டியளித்த வணிக வரித்துறை அமைச்சர் கே.சி.வீரமணி வேலூரை 2 மாவட்டமாக பிரிக்க ஏற்கனவே பல்வேறு கோரிக்கைகள் எழுந்துள்ளதாகவும் வேலூரை அரக்கோணம், வேலூர், திருப்பத்தூர் என 3 மாவட்டமாக பிரித்தால் சிறப்பாக இருக்கும் என்ற கருத்தை முதலமைச்சர் எடப்பாடி பழனிசாமியிடம் கூறியுள்ளதாக தெரிவித்தார்.

இது குறித்து பரிசீலித்து தேவையான நடவடிக்கை எடுக்கப்படும் என்று முதலமைச்சர் உறுதி அளித்துள்ளதாக தெரிவித்த அமைச்சர், அதற்காக ஏற்பாடுகள் நடைபெற்று வருவதாகவும் குறிப்பிட்டார்.