பஞ்சாப் – கொல்கத்தா அணிகள் இன்று பலப்பரீட்சை

ஐபில் தொடரின் 52 வது லீக் போட்டியில் கிங்ஸ் லெவன் பஞ்சாப் அணியும், கொல்கத்தா நைட் ரைடர்ஸ் அணியும் மொஹாலியில் இன்று மோதுகின்றன.

ஐபில் தொடர் கடந்த மார்ச் மாதம் 23ஆம் தேதி தொடங்கி இந்தியாவின் பல்வேறு நகரங்களில் நடைபெற்று வருகிறது. இதன் 52வது லீக் போட்டியில் அஸ்வின் தலைமையிலான கிங்ஸ் லெவன் பஞ்சாப் அணியும், தினேஷ் கார்த்திக் தலைமையிலான கொல்கத்தா நைட் ரைடர்ஸ் அணியும் மோதவுள்ளன. இதுவரை 12 ஆட்டங்களில் விளையாடியுள்ள இந்த இரு அணிகளும் 5 வெற்றி 7 தோல்வியை பெற்றுள்ள நிலையில், ரன்ரேட் அடிப்படையில், கொல்கத்தா 6 வது இடத்திலும், பஞ்சாப் 7 வது இடத்திலும் உள்ளன. கொல்கத்தா அணியை பொறுத்தவரை அந்த அணியின் பேட்டிங் தூணாக ஆந்த்ரே ரஸ்செல் உள்ளார். இந்த தொடரில் 50 சிக்சர்களை அடித்து வியக்க வைத்துள்ள ரஸ்செல் இதுவரை 486 ரன்கள் குவித்துள்ளார். அதேபோல், தொடக்கத்தில் வெற்றிகளை பெற்ற பஞ்சாப் இறுதிகட்டத்தில் தொடர் தோல்விகளால் துவண்டு போயுள்ளது. ஏறக்குறைய அடுத்த சுற்று வாய்ப்பை இழந்துவிட்ட இந்த இரு அணிகளும் மோதும் போட்டி மொஹாலியில் இன்று இரவு நடைபெற உள்ளது.