ப்ரோ கபடி லீக் தொடரின் 50 லீக் போட்டியில் வலுவான ஜெய்பூர் பிங்க் பேந்தர்ஸ் அணியை வீழ்த்திய உ.பி யோதா 3வது வெற்றியை பதிவு செய்தது.
ப்ரோ கபடி லீக் தொடர் இந்தியாவின் பல்வேறு நகரங்களில் நடைபெற்று வருகிறது. சென்னை நேரு உள்விளையாட்டு அரங்கில் நடந்த 50 வது லீக் போட்டியில் உ.பி யோதா அணியும் ஜெய்பூர் பிங்க் பேந்தர்ஸ் அணியும் மோதின. ஆட்டம் தொடங்கிய 20 வது வினாடியில் ஜெய்பூர் அணியின் தீபக் ஹூடா அணிக்கு முதல் 2 புள்ளிகளை பெற்று தந்தார். கூடுதல் புள்ளிகளை பெற இரு அணிகளுக்கும் கடும் போட்டி நிலவியது. இதனால், முதல் பாதியில் 16 க்கு 10 புள்ளிக்கணக்கில் உ.பி யோதா முன்னிலைப் பெற்றது. இதனையடுத்து தொடங்கிய 2 ஆம் பாதியில், தொடக்கம் முதலே ஆதீக்கம் செலுத்திய உ.பி யோதா அடுத்தடுத்து புள்ளிகளை குவித்தது.
இறுதியில், உ.பி யோதா 31க்கு 24 என்ற புள்ளிக்கணக்கில் வெற்றி பெற்று 3 வது வெற்றியை பதிவு செய்தது. இதன் மூலம், உ.பி யோதா அணி 2 வது முறையாக, ஜெய்பூரை ஆல் அவுட் செய்தது. முதலிடத்தில் உள்ள ஜெய்பூர் பிங் பேந்தர்ஸ் 2 வது தோல்வியை சந்தித்துள்ளது.