உலக கோப்பை கிரிக்கெட் தொடரின் 30 வது லீக் போட்டியில், தென் ஆப்பிரிக்காவுக்கு எதிரான போட்டியில், பாகிஸ்தான் அணி சிறப்பாக ஆடி 308 ரன்களை குவித்தது.
இங்கிலாந்தில் நடைபெற்று வரும் 12 வது உலக கோப்பை கிரிக்கெட் தொடரில் தற்போது லீக் சுற்று போட்டிகள் நடைபெற்று வருகிறது. இதன் 30 வது லீக் போட்டியில் தென் ஆப்பிரிக்காவும், பாகிஸ்தான் அணியும் இன்று பலப்பரீட்சை நடத்துகின்றன. அடுத்த சுற்று வாய்ப்பு ஏறக்குறைய மங்கியுள்ள நிலையில், இனி வரும் போட்டிகளில் வெற்றி பெற தென் ஆப்பிரிக்கா – பாகிஸ்தான் அணிகள் தீவிரம் காட்டி வருகிறது. லண்டன் லார்ட்ஸ் மைதானத்தில் நடைபெறும் இப்போட்டியில், டாஸ் வென்ற பாகிஸ்தான் அணி, பேட்டிங்கை தேர்வு செய்தது. அந்த அணியின் தொடக்க ஆட்டக்காரர்களாக இமாம் உல் ஹக்கும், ஃபகார் ஸமானும் களமிறங்கினர்.
இந்த இணை பாகிஸ்தான் அணிக்கு நல்ல துவக்கத்தை கொடுத்தது. ஃபகார் ஸமான் 44 ரன்களில் ஆட்டமிழந்தார். இதையடுத்து களமறிங்கிய முகமது ஹஃபீஸ் 20 ரன்கள் எடுத்திருந்த போது,மார்க்ரம் வீசிய பந்தில் ஆட்டமிழந்தார். சிறப்பாக ஆடிய பாபர் ஆசம் 69 ரன்கள் எடுத்து ஆட்டமிழந்தார். தொடர்ந்து, இமாத் வாசிம் 23 ரன்களிலும், அதிரடியாக ஆடிய ஹாரிஸ் சொஹைல் 89 ரன்களிலும் ஆட்டமிழந்தனர். அடுத்ததாக களமிறங்கிய வஹாப் ரியாஸ் 4 ரன்களில் ஆட்டமிழந்தார். 50 ஓவர்கள் முடிவில், பாகிஸ்தான் அணி 7 விக்கெட் இழப்பிற்கு 308 ரன்களை குவித்தது.