அதிமுக என் உயிர் – துணை முதல்வர் ஓ.பன்னீர்செல்வம் 

வேறு கட்சிக்கு போகப்போகிறேன் என்பது வடிகட்டிய பொய் என அதிமுக ஒருங்கிணைப்பாளர் ஓ.பன்னீர்செல்வம் கூறியுள்ளார்.
அதிமுக ஒருங்கிணைப்பாளரும், துணை முதலமைச்சருமான ஓ.பன்னீர்செல்வம் வெளியிட்டுள்ள அறிக்கையில், தன்னையும், தன் அரசியல் வாழ்க்கையையும் காயப்படுத்த நினைப்பதை நினைத்து மிகுந்த வேதனை கொள்வதாக தெரிவித்துள்ளார்.

வேறு கட்சிக்கு தான் போகப்போவதாக கூறப்படுவது வடிகட்டிய பொய் என்றும், அதிமுக தனது உயிர் என்றும் கூறியுள்ளார். தனது ஆயுள் முழுவதையும் அதிமுகவுக்காக ஒப்படைத்து தொண்டாற்றுகிற ஊழியனாக தான் இருப்பேன் என்றும் அதில் தெரிவித்துள்ளார்.

உயிர்போகும் நாளில் அதிமுக கொடி போர்த்துவதையே வாழ்நாள் லட்சியமாக கருதுவதாகவும், அடுக்காத பொய் குற்றச்சாட்டுகளையும் அவதூறுகளையும் கழகத் தொண்டனும் தமிழக மக்களும் ஏற்கமாட்டார்கள் என்றும் அந்த அறிக்கையில் துணை முதலமைச்சர் ஓ.பன்னீர்செல்வம் கூறியுள்ளார்.