மும்பையில் பெய்து வரும் தொடர் கனமழையால் இயல்பு வாழ்க்கை பாதிக்கப்பட்டு வரும் நிலையில், இன்றும் நாளையும் கனமழைக்கு வாய்ப்பிருப்பதாக வானிலை ஆய்வு மையம் எச்சரிக்கை விடுத்துள்ளது.
மகாராஷ்டிரா மாநிலம் மும்பை மற்றும் அதன் சுற்று வட்டார பகுதிகளில் கடந்த சில தினங்களாக கனமழை பெய்து வருகிறது. இதனால், பொதுமக்களின் இயல்பு வாழ்க்கை பெரிதும் பாதிக்கப்பட்டுள்ளது. இதனால் சாலைகளில் வெள்ளம் பெருக்கெடுத்து ஓடியதால், போக்குவரத்து பாதிக்கபட்டது. அதை தொடர்ந்து ரயில் சேவையும் நிறுத்தப்பட்டுள்ளது. கடந்த 14 ஆண்டுகளுக்கு பிறகு மும்பையில் பெரும் சேதத்தை ஏற்படுத்திய இந்த கனமழையில் சிக்கி 20 க்கும் மேற்பட்டோர் உயிரிழந்தனர். இந்நிலையில், மும்பை மற்றும் அதன் சுற்று வட்டார பகுதிகளில் இன்றும் நாளையும் கனமழை பெய்யக் கூடும் என வானிலை ஆய்வு மையம் எச்சரிக்கை விடுத்துள்ளது. மேலும், பொதுமக்கள் பாதுகாப்பாக இருக்கும் படியும் அறிவுறுத்தப்பட்டுள்ளது.