ஹாலிவுட் சினிமாவில் வரும் கிராபிக்ஸ் காட்சிகளை மிஞ்சும் அளவுக்கு, பல வீடியோக்களை சொந்தமாக உருவாக்கி, வலைத்தளவாசிகளை தொடர்ந்து அசரடித்து வரும் இன்ஸ்டாகிராம் பிரபலம் கெவின் லஸ்ட் கார்டன்.
லத்தீன் அமெரிக்க நாடான வெனிசுலாவில் பிறந்த கெவின் லஸ்ட்கார்டனின் வீடியோக்கள் நாடு, மொழி பேதமின்றி உலகமெங்கும் உள்ள மக்களை அசரவைக்கின்றன. சமூக வலைத்தளங்களில் இவரது வீடியோக்கள் இதுவரை குறைந்தது 50 கோடிமுறைகளுக்கும் அதிகமாக பார்வையிடப்பட்டு உள்ளன. மந்திரவாதிகள் மேடைகளில் செய்வதை, இணையத்தில் எடிட்டிங் துணையோடு செய்கிறார் இவர். ஆனால் இவரது வீடியோக்களில் எது உண்மை, எது எடிட் செய்யப்பட்டது என்று கண்டுபிடிப்பது சிரமம். இதனால் இவரது வீடியோவைப் பார்க்கும் யாரும் அதனை இரண்டாம் முறையாகப் பார்க்காமல் கடந்து போக முடியாது.
தனது 11 ஆவது வயதில் இருந்தே யூடியூபின் வீடியோக்களை கூர்ந்து கவனிக்கும் வழக்கம் கெவினுக்கு இருந்தது. அந்த வீடியோக்களால் உந்தப்பட்டு தானும் சில விடியோக்களை உருவாக்கினார். கடந்த 2015 ஜூனில்தான் இன்ஸ்டாகிராமில் தனது முதல் வீடியோவைக் கெவின் பதிவிட்டார். பின்னர் 2017ஆம் ஆண்டில் 4 மாத காலம் கூகுள் நிறுவனத்தில் பயிற்சி பெறுபவராகப் பணியாற்றிய இவர், அங்கு யூ-டியூபில் பணியாற்றுபவர்களிடம் இருந்து பல புதிய எடிட்டிங் தொழில்நுட்பங்களையும் அவற்றுக்கு கோடிங் எழுதும் முறைகளையும் கற்றுக் கொண்டார்.
தான் புதிதாகக் கற்றுக் கொண்டவற்றைக் கொண்டு கெவின் உருவாக்கும் வீடியோக்கள் தான் தற்போது இணைய உலகை அதிர வைத்துக் கொண்டிருக்கின்றன. கிராபிக்ஸ்களை உருவாக்க பெரிய பொருட்செலவெல்லாம் தேவை இல்லை, அறிவும் தெளிவும் மட்டும் இருந்தால் போதும் – என்று இன்றைய இளைஞர்களுக்கு செயலால் வழிகாட்டுகிறார் கெவின் லஸ்ட்கார்டன். இவர் தனது இண்டாகிராம் பக்கம் தவிர பிபிசி, இன்சைடர் – உள்ளிட்ட நிறுவனங்களுக்காகவும் அவ்வப்போது வீடியோக்களை உருவாக்கி வருகிறார். திறமையை வளர்த்துக் கொண்டால், உலகம் உன்கையில் என்பதற்கு இவரும் நல்ல உதாரணம்.