தென்னாப்பிரிக்காவுக்கு எதிரான டெஸ்ட் கிரிக்கெட் தொடரில் பங்கேற்கும் இந்திய அணி இன்று அறிவிக்கப்பட உள்ளது.
இந்தியா வந்துள்ள தென்னாப்பிரிக்கா கிரிக்கெட் அணி, மூன்று 20 ஓவர் மற்றும் 3 டெஸ்ட் போட்டிகளில் விளையாட இருக்கிறது. முதலாவது 20 ஓவர் போட்டி தர்மசாலாவில் வரும் 15ம் தேதி நடைபெற உள்ளது. அதற்கான இந்திய அணி ஏற்கனவே அறிவிக்கப்பட்டு விட்டது. முதல் டெஸ்ட் கிரிக்கெட் போட்டி விசாகப்பட்டினத்தில் அக்டோபர் 2ம் தேதி நடைபெற உள்ளது.
தென்னாப்பிரிக்காவுக்கு எதிரான முதல் 2 டெஸ்ட் போட்டிக்கான இந்திய கிரிக்கெட் அணி தேர்வு டெல்லியில் இன்று நடைபெற இருக்கிறது. எம்.எஸ்.கே. பிரசாத் தலைமையிலான தேர்வு குழுவினர் கூடி ஆலோசித்து வீரர்களை தேர்வு செய்ய இருக்கின்றனர்.
தொடக்க ஆட்டக்காரராக விளையாட லோகேஷ் ராகுலுக்கு பதில், ரோகித் சர்மாவுக்கு வாய்ப்பு அளிக்கப்படலாம் என கூறப்படுகிறது. காயமடைந்த புவனேஷ்வர்குமார் இன்னும் முழு உடல் தகுதியை எட்டாததால், அவர் அணியில் இடம்பிடிக்க வாய்ப்பில்லை. மாற்று வேகப்பந்து வீச்சாளராக நவ்தீப் சைனிக்கு இடம் கிடைக்கலாம் என எதிர்பார்க்கப்படுகிறது.