இந்தியா – தென் ஆப்ரிக்கா அணிகள் மோதும் முதலாவது டெஸ்ட் போட்டி, ஆந்திர மாநிலம் விசாகப்பட்டினத்தில் இன்று தொடங்குகிறது.
தென் ஆப்ரிக்கா கிரிக்கெட் அணி, இந்தியாவில் சுற்றுப் பயணம் மேற்கொண்டு டி20, டெஸ்ட் மற்றும் ஒருநாள் போட்டிகளில் விளையாடுகிறது. முதலில் நடந்து முடிந்த டி20 தொடரில் இரு அணிகளும் தலா ஒருநாள் போட்டியில் வென்று தொடரை சமன் செய்தது. இதனையடுத்து, 3 ஆட்டங்கள் கொண்ட டெஸ்ட் தொடரின் முதலாவது போட்டி இன்று தொடங்குகிறது. ஆந்திர மாநிலம் விசாகப்பட்டினத்தில் தொடங்கும் இந்த போட்டியில், விராட் கோலி தலைமையிலான இந்திய அணி, டு பிளெசிஸ் தலைமையிலான தென் ஆப்ரிக்கா அணியை எதிர் கொள்கிறது. இன்றைய போட்டியில், இந்திய அணியின் தொடக்க ஆட்டக்காராக ரோஹித் ஷர்மா களமிறங்குவார் என தெரிவிக்கப்பட்டுள்ளது. ஒருநாள் மற்றும் டி20 போட்டிகளில் அசத்தி வரும் ரோஹித் ஷர்மா, டெஸ்ட் போட்டியில் சொதப்பி வருகிறார். ரோஹித் ஷர்மா சிறப்பான ஆட்டத்தை வெளிப்படுத்த தவறும் பட்சத்தில் டெஸ்ட் அணியில் இருந்து நீக்கப்பட வாய்ப்பு அதிகம் உள்ளதாக கூறப்படுகிறது. காயத்திலிருந்து மீண்ட விக்கெட் கீப்பர் விர்த்தமன் சாகா, இன்றைய போட்டியில் விளையாடுவார் என்றும் அறிவிக்கப்பட்டுள்ளது. டெஸ்ட் தொடர் உலக டெஸ்ட் சாம்பியன்ஷிப் கணக்கில் வருவதால், மிகவும் முக்கியத்துவம் வாய்ந்ததாக கருதப்படுகிறது.