விநாயகர் சதுர்த்தி திருநாளையொட்டித் தமிழக மக்களுக்கு முதலமைச்சர் எடப்பாடி பழனிசாமி வாழ்த்துக்களைத் தெரிவித்துள்ளார்.
முதலமைச்சர் விடுத்துள்ள செய்தியில், விநாயகர் சதுர்த்தியை மகிழ்ச்சியுடன் கொண்டாடும் மக்கள் அனைவருக்கும் எனது உளம் கனிந்த நல்வாழ்த்துகளைத் தெரிவித்துக் கொள்வதாகக் குறிப்பிட்டுள்ளார். விநாயகர் சதுர்த்தித் திருநாளில், மக்கள் தங்கள் இல்லங்களில், களிமண்ணாலான விநாயகர் சிலையை வைத்து, அறுகம்புல், எருக்கம் பூ, செம்பருத்திப் பூ, அரளி மலர், வில்வ இலை போன்றவைகளைக் கொண்டு மாலைகள் சூட்டிக், கொழுக்கட்டை, சுண்டல், பொரி, அவல், கரும்பு, பழங்கள் போன்றவற்றைப் படைத்து, பக்தியுடன் வழிபட்டுக் கொண்டாடி மகிழ்வார்கள் எனக் குறிப்பிட்டுள்ளார். விநாயகர் சதுர்த்தித் திருநாளில் வீடெங்கும் அன்பும் மகிழ்ச்சியும் நிறையட்டும், நாடெங்கும் நலமும் வளமும் பெருகட்டும் என முதலமைச்சர் தனது வாழ்த்துச் செய்தியில் தெரிவித்துள்ளார்.