“தாங்க முடியாத சோகத்தை கொடுத்துள்ளது” – விவேக் மறைவுக்கு திரையுலகம் இரங்கல்!

உடல்நலக்குறைவால் காலமான நகைச்சுவை நடிகர் விவேக்கின் மறைவுக்கு திரைபிரபலங்கள் பலரும் இரங்கல் தெரிவித்துள்ளனர்.

நடிகர் விவேக், தனது திரையுலக வாழ்நாள் முழுவதும் அனைவரையும் சிரிக்க வைத்த சிறந்த மனிதர் என ட்விட்டரில் பதிவிட்டுள்ள மலையாள நடிகர் மம்முட்டி, விவேக்கின் மறைவு அனைவரது இதயங்களையும் உடைக்கும் அளவிற்கு சோகத்தை ஏற்படுத்தியுள்ளதாகவும் உணர்ச்சிப்பூர்வமாக குறிப்பிட்டுள்ளார்.

நகைச்சுவை நடிகர் விவேக்கின் மறைவுக்கு மலையாள நடிகர் துல்கர் சல்மான் இரங்கல் தெரிவித்துள்ளார். இது தொடர்பாக ட்விட்டரில் பதிவிட்டுள்ள அவர், நடிகர் விவேக்கை திரைப்படங்களில் பார்க்கும் போது, நம்முடன் நன்கு பரிச்சயமானவர் என்ற உணர்வு தான் ஒவ்வொருவருக்கும் வரும் என குறிப்பிட்டுள்ளார். நடிகர் விவேக்கின் மறைவு, தாங்க முடியாத சோகத்தை கொடுத்துள்ளதாகவும் துல்கர் சல்மான் உருக்கமாக தெரிவித்துள்ளார்.

இதே போன்று, நடிகர் மோகன்லால் உள்ளிட்ட பல்வேறு நடிகர்களும், பிரபலங்களும் நகைச்சுவை நடிகர் விவேக்கின் மறைவுக்கு இரங்கல் தெரிவித்துள்ளனர்.