பதினொன்றாம் வகுப்பு பொதுத்தேர்வு இன்று தொடங்குகிறது

பனிரெண்டாம் வகுப்பு தேர்வுகள் ஏற்கனவே தொடங்கி நடைபெற்று வரும் நிலையில், பதினொன்றாம் வகுப்பு பொதுத்தேர்வு இன்று தொடங்குகிறது.

2019-20-ம் கல்வியாண்டுக்கான பதினொன்றாம் வகுப்புக்கான பொதுத்தேர்வு இன்று தொடங்குகிறது. வரும் 26-ந்தேதி வரை நடைபெற உள்ள ஒவ்வொரு தேர்வுகளும், காலை 10 மணிக்கு தொடங்கி, பிற்பகல் ஒன்றே கால் மணி வரை நடைபெற உள்ளது. தமிழ்நாடு மற்றும் புதுச்சேரியில் உள்ள 7 ஆயிரத்து 400 மேல்நிலைப்பள்ளிகளில் இருந்து 8 லட்சத்து 26 ஆயிரத்து 119 தேர்வர்களும், 6 ஆயிரத்து 356 தனித்தேர்வர்களும் என மொத்தமாக, 8 லட்சத்து 32 ஆயிரத்து 475 பேர் இந்த பொதுத்தேர்வை எழுத உள்ளனர்.

இந்த தேர்வுக்காக, இந்த ஆண்டு கூடுதலாக ஏற்படுத்தப்பட்ட 113 தேர்வு மையங்களுடன் சேர்த்து, தமிழ்நாடு மற்றும் புதுச்சேரியில் மொத்தம் 3 ஆயிரத்து 16 தேர்வு மையங்கள் அமைக்கப்பட்டு உள்ளன. பிளஸ்-1 பொதுத்தேர்வுக்காக மொத்தம் 40 ஆயிரத்திற்கும் மேற்பட்ட ஆசிரியர்கள் அறை கண்காணிப்பாளர்களாக பணியில் ஈடுபடுத்தப்பட உள்ளனர்.

தேர்வு மைய வளாகத்துக்குள் தேர்வர்கள் செல்போன் எடுத்துவரக்கூடாது எனவும், அத்துடன் தேர்வு பணியில் ஈடுபடும் ஆசிரியர்களும் தேர்வு அறையில் செல்போன் வைத்திருக்க கூடாது எனவும் உத்தரவிடப்பட்டுள்ளது.