இந்திய அணியில் இருந்து தோனி ஓய்வு பெறுவதாக அதிகாரப்பூர்வமாக தகவல் இல்லை என்றும், ஊடகங்கள் மட்டுமே அவ்வாறு கூறி வருகின்றன என்றும் சென்னை சூப்பர் கிங்ஸ் அணியின் தலைமை செயல் அதிகாரியான காசி விஸ்வநாதன் கூறினார்.
சென்னை விருகம்பாக்கத்தில் உள்ள தனியார் பள்ளியில் கிரிக்கெட் விளையாடும் மாணவர்களை ஊக்குவிக்கும் நிகழ்ச்சி நடைபெற்றது. இந்த நிகழ்ச்சியில் சென்னை சூப்பர் கிங்ஸ் அணியின் தலைமை செயல் அதிகாரி காசி விஸ்வநாதன் பங்கேற்று கிரிக்கெட் போட்டிகளில் சிறப்பாக விளையாடும் மாணவர்களுக்கு பரிசுகள் வழங்கி பாராட்டினார். நிகழ்ச்சிக்கு பின் செய்தியாளார்களை சந்தித்த அவர், இந்திய அணியில் இருந்து தோனி ஓய்வு பெறுவதாக இன்னும் அறிவிக்கவில்லை, அவர் ஓய்வு பெற போவதாக ஊடகங்கள் மட்டுமே கூறி வருகின்றன என்று கூறினார். மேலும், சென்னை சூப்பர் கிங்ஸ் அணிக்கான தோனியின் ஒப்பந்தம் இன்னும் மூன்றாண்டுகள் வரையில் இருப்பதாகவும், அவர் தொடர்ந்து சி.எஸ்.கே அணிக்காக விளையாடுவார் என்றும் கூறினார்.