ஜப்பான் கப்பலில் மேலும் ஒரு இந்தியருக்கு கொரோனா வைரஸ் தொற்று

ஜப்பான் சொகுசு கப்பலில் மேலும் ஒரு இந்தியருக்கு கொரோனா வைரஸ் தொற்று இருப்பது உறுதிபடுத்தப்பட்டுள்ளது.

சீனாவில் வேகமாக பரவி வரும் கொரோனா வைரஸ் காய்ச்சலால் உயிரிழப்பு எண்ணிக்கை அதிகரித்து கொண்டே வருகிறது.  

இந்த நிலையில், ஹாங்காங்கில் இருந்து ஜப்பான் துறைமுகத்துக்கு வந்த ‘டைமண்ட் பிரின்சஸ்’ சொகுசு கப்பல், கொரோனா வைரஸ் பீதி காரணமாக கடலிலேயே நிறுத்தப்பட்டுள்ளது. அதில் இருந்த 3 ஆயிரத்து 700க்கும் மேற்பட்ட பயணிகள், ஊழியர்களுக்கு மருத்துவ பரிசோதனை நடத்தப்பட்டது.

இதில் பலருக்கு கொரோனா நோய் தொற்று இருப்பது கண்டறியப்பட்டது. அந்த கப்பலில் இதுவரை மொத்தம் 218 பேருக்கு கொரோனா வைரஸ் இருப்பது உறுதிப்படுத்தப்பட்டுள்ளது. அந்த கப்பலில் உள்ள 138 இந்தியர்களில், 2 பேருக்கு கொரோனா இருப்பது கண்டறியப்பட்டது.

தற்போது மேலும் ஒருவருக்கு அந்த பாதிப்பு ஏற்பட்டுள்ளது. சீனாவில் கொரோனா வைரஸ் பாதிப்புக்கு ஆளாகி நேற்று மேலும் 143 நபர்கள் பலியாகியுள்ளனர். இதன்மூலம் சீனாவில், கொரோனா வைரஸ் பாதிப்பால் பலியானோர் எண்ணிக்கை ஆயிரத்து 631 ஆக உயர்ந்துள்ளது.