மாநகரப் பேருந்தில் இடையூறு ஏற்படுத்திய கல்லூரி மாணவர்கள்

சென்னை மாநகரப்பேருந்தில் பச்சையப்பன் கல்லூரி மாணவர்கள் பயணிகளுக்கு இடையூறு ஏற்படுத்தியதால், ஓட்டுநர் பேருந்தைச் சாலையிலேயே நிறுத்திச் சென்றார்.

சென்னை கீழ்ப்பாக்கம் பச்சையப்பன் கல்லூரி மாணவர்கள் திருவேற்காடு நோக்கிச் சென்று கொண்டிருந்த 159-ஆம் எண் மாநகரப் பேருந்தில் ஏறிக் கோயம்பேடு நோக்கிச் சென்று கொண்டிந்தனர். இந்நிலையில், பேருந்து அரும்பாக்கம் வைஷ்ணவா கல்லூரி அருகே வந்து கொண்டிருந்த போது பச்சையப்பன் கல்லூரி மாணவர்கள் பேருந்துக்குள் ஆட்டம் போட்டுக் கொண்டு பயணிகளுக்கு இடையூறு ஏற்படுத்தினர். மாணவர்களின் செய்கையால் கோபமடைந்த  ஓட்டுநர் பேருந்தைச் சாலையிலேயே நிறுத்தி விட்டுக் கீழே இறங்கிச் சென்றார். இதனால் அந்தப் பகுதியில் போக்குவரத்து நெரிசல் ஏற்பட்டதை அடுத்து அங்கு வந்த போக்குவரத்துக் காவல் துறையினர், ஓட்டுநர் மற்றும் நடத்துநரிடம் பேச்சு நடத்திப் பேருந்தை இயக்க வலியுறுத்தினர். பின்னர் பேருந்து அங்கிருந்து இயக்கப்பட்டதால் அப்பகுதியில் போக்குவரத்து சீரானது.