வாக்களிப்பதின் அவசியத்தை வலியுறுத்தி, தூத்துக்குடி வ.உ.சி. அரசு பொறியியல் கல்லூரி மாணவ, மாணவியர் விழிப்புணர்வு மௌன நாடகம் நடத்தினர்.
மக்களவை மற்றும் இடைத்தேர்தல் நெருங்குவதை ஒட்டி, வாக்காளர்களுக்கு விழிப்புணர்வு ஏற்படுத்தும் வகையில், வ.உ.சி. அரசு பொறியியல் கல்லூரியில் கலை நிகழ்ச்சிகள் நடைபெற்றது. இந்நிகழ்ச்சியில் மாநகராட்சி ஆணையர் ஜெயசீலன் உள்ளிட்டோர் கலந்து கொண்டனர்.
நிகழ்ச்சியில் பேசிய ஆணையர் ஜெயசீலன், அனைவரும் வாக்களிக்கவேண்டும் என்பதற்காக தேர்தல் ஆணையம் பல்வேறு முயற்சிகளை மேற்கொண்டுள்ளது என்றும் அனைவரும் கண்டிப்பாக வாக்களிக்க வேண்டும் என்றும் கேட்டுக்கொண்டார். இதைத்தொடர்ந்து மாணவ, மாணவிகளின் விழிப்புணர்வு மௌன நாடகம் நடைபெற்றது.
இதில், பணத்தை பெற்றுக்கொண்டு வாக்களிக்கக் கூடாது, நல்ல தலைவர்களை தேர்ந்தெடுக்க வேண்டும் போன்ற கருத்துக்கள் வலியுறுத்தப்பட்டது.