உலகம் முழுவதும் கிறிஸ்துமஸ் பண்டிகை இன்று கோலாகலமாக கொண்டாடப்பட்டு வருகிறது. தமிழகத்தில் உள்ள கிறிஸ்தவ தேவாலயங்களில் நள்ளிரவில் நடைபெற்ற சிறப்பு பிரார்த்தனை மற்றும் கூட்டுத் திருப்பலியில் பல்லாயிரக்கணக்கானோர் கலந்து கொண்டனர்.
இயேசு கிறிஸ்துவின் பிறப்பு கிறிஸ்துமஸ் பண்டிகையாக உலகம் முழுவதும் டிசம்பர் 25ஆம் தேதியான இன்று கொண்டாடப்பட்டு வருகிறது. இதையொட்டி, கிறிஸ்தவ தேவாலயங்கள் மற்றும் வீடுகளில் கிறிஸ்துமஸ் மரம், குடில்கள் அமைத்தும், வண்ண விளக்குகளால் அலங்கரித்தும் கிறிஸ்துமஸ் பண்டிகையை மக்கள் உற்சாகமாக கொண்டாடி வருகின்றனர்.
இதேபோல், நாடு முழுவதும் உள்ள கிறிஸ்தவ தேவாலயங்களில் கிறிஸ்துமஸ் சிறப்பு பிராத்தனையில் ஆயிரக்கணக்கானோர் கலந்து கொண்டனர். தலைநகர் டெல்லியில் உள்ள திருஇருதய ஆண்டவர் ஆலயம், கிறிஸ்துமஸ் பண்டிகையையொட்டி வண்ண மின் விளக்குகளால் அலங்கரிக்கப்பட்டு ஜொலித்தது. பழமையான தேவாலயங்களில் இங்கு நள்ளிரவில் நடைபெற்ற சிறப்பு பிரார்த்தனையில் கடும் குளிரையும் பொருட்படுத்தாமல் ஏராளமானோர் கலந்து கொண்டு பிரார்த்தனை செய்தனர்.