நல்ல தலைவர்களை தேர்ந்தெடுத்து வாக்களிக்க வேண்டும் – கபில்தேவ்

மக்களை நல்வழிப்படுத்தும் அரசியல் கட்சிகளுக்கு வாக்களிக்க வேண்டும் என்று இந்திய கிரிக்கெட் அணியின் முன்னாள் கேப்டன் கபில்தேவ் தெரிவித்துள்ளார்

வேலூர் ஆம்பூரில் கழிப்பறை கட்டித்தராததால் தந்தை மீது காவல் நிலையத்தில் புகார் அளித்த மாணவி ஹனிபா ஜாராவின் நற்செயலை பாராட்டும் விதமாகவும், ஏழை எளிய மாணவர்களுக்கு தனிநபர் கழிப்பறை கட்டுவதற்கான ஆணை வழங்கும் விழா நடைபெற்றது. இதில், இந்திய கிரிக்கெட் அணியின் முன்னாள் கேப்டன் கபில்தேவ் சிறப்பு விருந்தினராக கலந்துகொண்டு, பள்ளி நிர்வாகத்தால் வழங்கப்பட்ட ஒரு லட்சம் ரூபாய்க்கான காசோலை மற்றும் கேடயத்தை மாணவி ஹனிபாவுக்கு வழங்கினார். அப்போது பேசிய அவர், இன்றைய காலகட்டத்தில் நாட்டிற்கும், சமூகத்திற்கும் நல்ல இளைஞர்கள் தேவைப்படுகின்றனர் என்று கூறினார்.  நாட்டையும், மக்களையும் நெறிப்படுத்த, நல்ல தலைவர்களை தேர்ந்தெடுத்து வாக்களிக்கவேண்டும் என்று இளைஞர்களுக்கு வேண்டுகோள் விடுத்தார்.