வடிவேலு பாணியில் புல்லட் ஷோரூமில் இருந்து இருசக்கர வாகனத்தை ஓட்டிப் பார்ப்பதாக கூறி எடுத்துச் சென்ற வாலிபர் மீண்டும் திரும்பவில்லை என்று குரோம்பேட்டை காவல்நிலையத்தில் புகார் அளிக்கப்பட்டுள்ளது. பார்த்திபன் – வடிவேலு நடிப்பில் குண்டக்க மண்டக்க என்ற படத்தில் வடிவேலு, ஆட்டோ ஒன்றை விலைக்கு வாங்க வந்து ஓட்டிப்பார்க்க கேட்டு அப்படியே எடுத்துச்சென்று விடுவார். இதேபோல சென்னை, குரோம்பேட்டை ஜி.எஸ்.டி. சாலையில் உள்ள புல்லட் ஷோரூம் ஒன்றிற்கு புல்லட் வாங்குவதற்காக கடந்த 5 ஆம் தேதி அன்று டிப் டாப் ஆசாமி ஒருவர் வந்துள்ளார்.
வாகனம் வாங்குவதற்கு முன்பு ஓட்டிப் பார்க்க வேண்டும் என்று கூறியதை அடுத்து, ஷோரூம் மேலாளர் அவருக்கு அனுமதி அளித்துள்ளார். வாகனத்தை எடுத்துச் சென்ற அந்த நபர், 3 மணி நேரம் ஆகியும் ஷோரூமிற்கு திரும்பி வரவில்லை என்று கூறப்படுகிறது. இந்த நிலையில், ஷோரூமின் மேலாளர், குரோம்பேட்டை காவல் நிலையத்தில் புகார் அளித்துள்ளார். இந்த புகாரின் அடிப்படையில், ஷோரூமில் உள்ள சிசிடிவி கேமரா காட்சிப் பதிவுகளை போலீசார் ஆய்வு செய்து வருகின்றனர்.