தீவிரவாத அமைப்பை விட்டு வெளியேறி, தேசத்திற்காக உயிர்த்தியாகம் செய்த ராணுவ வீரர் நசீர் அகமது வானிக்கு ராணுவத்தின் மிக உயரிய விருதான அசோக சக்ரா விருது அறிவிக்கப்பட்டுள்ளது.
ராணுவத்தில் வீரதீர செயல் புரிந்தவர்களுக்கு ஆண்டுதோறும் விருதுகள் வழங்கப்படுகின்றன. இந்நிலையில் ராணுவத்தில் மிக உயரிய விருதான அசோக சக்ரா விருது இந்தமுறை ராணுவ வீரர் நசீர் அகமது வானிக்கு அறிவிக்கப்பட்டுள்ளது. ஜம்மு காஷ்மீர் மாநிலம் குல்காமின் அஷ்முஜி என்ற பகுதியை சேர்ந்த நசீர் அகமது வானி, தீவிரவாத அமைப்பை விட்டுவெளியேறி சரணடைந்தார். பின்னர் கடந்த 2004ஆம் ஆண்டில் ராணுவத்தில் தன்னை இணைத்துக் கொண்டார். தீவிரவாதத்திற்கு எதிராக தொடர்ந்து போராடிய வானி, கடந்த ஆண்டு சோபியான் மாவட்டத்தில் தீவிரவாதிகளுடன் நடைபெற்ற சண்டையில் வீர மரணம் அடைந்தார். இந்நிலையில் அவருக்கு இந்த ஆண்டிற்கான அசோக சக்ரா விருது அறிவிக்கப்பட்டுள்ளது. தீவிரவாதத்திற்கு எதிராக தொடர்ந்து போராடியதற்காக வானிக்கு ஏற்கனவே ராணுவ விருதுகள் அளிக்கப்பட்டுள்ளன என்பது குறிப்பிடத்தக்கது.