அரசு கலை அறிவியல் கல்லூரிகள் மற்றும் தனியார் கலை அறிவியல் கல்லூரிகளில் சேருவதற்கு மாணவர்கள் இன்று முதல் ஆன்லைனில் விண்ணப்பிக்கலாம் என கல்லூரி கல்வி இயக்குனரகம் தெரிவித்துள்ளது.
இதுதொடர்பாக வெளியிடப்பட்டுள்ள அறிக்கையில், தமிழக அரசு கட்டுப்பாட்டின் கீழ் இயங்கும் 109 கலை அறிவியல் கல்லூரிகள் மற்றும் 139 அரசு உதவி பெறும் கலை அறிவியல் கல்லூரிகளில் மாணவர்கள் சேர்வதற்காக இன்று முதல் ஆன்லைனில் பதிவு செய்யலாம் எனத் தெரிவிக்கப்பட்டுள்ளது. தனியார் கலைக் கல்லூரிகள் அச்சடிக்கப்பட்ட விண்ணப்பங்களை வழங்கக் கூடாது என அறிவுறுத்தியுள்ள கல்லூரி கல்வி இயக்குனரகம், ஆன்லைனில் மட்டுமே விண்ணப்ப பதிவை நடத்த வேண்டும் என உத்தரவிட்டுள்ளது. மாணவர்களின் விண்ணப்பங்களை பெற்ற பிறகு தரவரிசை அடிப்படையில் சேர்க்கை நடைபெறும் என்றும் கல்லூரி கல்வி இயக்குனரகம் விளக்கம் அளித்துள்ளது. அரசு கல்லூரிகளில் சேர www.tngasa.in மற்றும் www.tndceonline.org ஆகிய இணையதளங்களில் மாணவர்கள் விண்ணப்பிக்கலாம் என்று குறிப்பிடப்பட்டுள்ளது.