கடலூர் மாவட்டம் விருத்தாச்சலத்தில் சாலை விபத்தில் காயமடைந்து உயிருக்கு போராடிக் கொண்டிருந்த நபரை மீட்டு மருத்துவமனையில் சேர்த்த தீயணைப்புத் துறையினரை பொதுமக்கள் வெகுவாக பாராட்டினர்.
விருத்தாச்சலம் அருகே மாவிடந்தல் கிராமத்தைச் சேர்ந்த துரை என்பவர் இருசக்கர வாகனத்தில் பயணித்துள்ளார்.விருத்தாச்சலம் தீயணைப்பு நிலையம் அருகே வந்த போது அடையாளம் தெரியாத வாகனம் மோதியதில் தலையில் பலத்த காயமடைந்து சாலையில் கிடந்துள்ளார். இதைக் கண்ட பொதுமக்கள் தீயணைப்புத் துறையினரிடம் தகவல் கொடுத்துள்ளனர். நிலைமையின் தீவிரத்தை உணர்ந்த தீயணைப்புத் துறையினர் சற்றும் தாமதிக்காமல் தீயணைப்புத் துறை வாகனத்திலேயே காயமடைந்தவரைக் கொண்டு சென்று மருத்துவமனையில் சேர்த்தனர். தக்க சமயத்தில் துரிதமாக செயல்பட்டு உயிரைக் காப்பாற்றிய தீயணைப்புத் துறையினரை பொதுமக்கள் வெகுவாக பாராட்டினர்.