அம்பத்தூர் ரியல் எஸ்டேட் தொழிலதிபர் கடத்தல் விவகாரத்தில் 5பேர் கைது

சென்னை அம்பத்தூரில் ரியல் எஸ்டேட் தொழிலதிபர் கடத்தல் விவகாரத்தில் 5 பேரை காவல்துறையினர் கைது செய்து விசாரணை மேற்கொண்டு வருகின்றனர்.

சென்னை கள்ளிக்குப்பத்தை சேர்ந்த ரியல் எஸ்டேட் தொழில் செய்து வரும் சுடலை முத்துவுக்கும், தொழிலதிபருமான தாமோதரனுக்கும் நிலம் கொடுக்கல் வாங்கலில் தகராறு இருந்ததாக கூறப்படுகிறது. இந்த நிலையில், சுடலை முத்து, புறம்போக்கு நிலத்தை தாமோதரனுக்கு ஏமாற்றி விற்றதாகவும், இதனை அறிந்த தாமோதரனின் மகன் தனது பணத்தை, கொடுக்குமாறு சுடலை முத்துவிடம் கேட்டுள்ளார். ஆனால் தொடர்ந்து சுடலை முத்து ஏமாற்றி வந்ததால் ஆத்திரமடைந்த தாமோதரனின் மகன் முத்துக்குமார், சுடலை முத்துவை கடத்தி சென்று சிறை வைத்ததாகவும், 3 கோடி ரூபாய் கேட்டு மிரட்டியதாகவும், சுடலை முத்துவின் மனைவி ரோஜா காவல்நிலையத்தில் புகார் அளித்தார். இதனையடுத்து சுடலைமுத்துவை மீட்ட காவல்துறையினர், முத்துக்குமார் உட்பட 5பேரை கைது செய்து விசாரணை மேற்கொண்டு வருகின்றனர்.