தாக்குதல் தொடர்வதால் மீனவர்கள் மத்தியில் அச்சம்

இலங்கை கடற்படையால் இன்று காலை நாகை மீனவர்கள் 5 பேர் கைது செய்யப்பட்ட நிலையில், புதுக்கோட்டையைச் சேர்ந்த மேலும் 5 மீனவர்கள் கைது செய்யப்பட்டுள்ளது அதிர்ச்சியை ஏற்படுத்தியுள்ளது.

இலங்கை கடற்படையால் தமிழக மீனவர்கள் கைது செய்யப்படுவது தொடர்கதையாகி வருகிறது.நேற்று இரவு கச்சத்தீவு அருகே மீன்பிடித்துக் கொண்டிருந்த ராமேஸ்வரம் மீனவர்கள், இலங்கை படையினரால் விரட்டியடிக்கப்பட்டனர். இதேபோல், நெடுந்தீவு அருகே மீன்பிடித்துக் கொண்டிருந்த நாகப்பட்டினம் மீனவர்கள் 5 பேரை, இலங்கை கடற்படையினர் கைது செய்து, காங்கேசன் துறைமுகத்திற்கு அழைத்துச் சென்றனர்.

இந்த பதற்றம் தணிவதற்குள், புதுக்கோட்டை மாவட்டம் ஜெகதாப்பட்டினத்தைச் சேர்ந்த மேலும் 5 மீனவர்கள் இலங்கை கடற்படையினரால் கைது செய்யப்பட்டுள்ளனர். மீனவர்கள் மீதான தாக்குதல் மற்றும் கைது நடவடிக்கையால் தமிழக மீனவர்கள் அச்சத்தில் ஆழ்ந்துள்ளனர்.