தமிழகத்தில் கொரோனா தொற்றால் பாதிக்கப்பட்டவர்களின் எண்ணிக்கை 10 ஆயிரத்து 108 ஆக அதிகரித்துள்ளது. கொரோனா பாதிப்பு உறுதிசெய்யப்பட்டவர்களில் 40 பேர் மகாராஷ்டிராவில் இருந்து வந்த தமிழக தொழிலாளர்கள் என தெரிவிக்கப்பட்டுள்ளது. இதேபோல் மாலத்தீவில் இருந்து தமிழகம் வந்த 6 பேருக்கும், குஜராத்தில் இருந்து வந்த 2 பேருக்கும், கர்நாடகாவில் இருந்து வந்த ஒருவருக்கும் கொரோனா பாதிப்பு கண்டறியப்பட்டுள்ளதாக தெரிவிக்கப்பட்டுள்ளது.
இதுவரை இல்லாத வகையில் கொரோனாவுக்கு சிகிச்சை பெற்று வந்த 359 பேர் ஒரே நாளில் குணமடைந்துள்ளனர். இதனால் கொரோனாவில் இருந்து மீண்டவர்களின் எண்ணிக்கை 2 ஆயிரத்து 599 ஆக அதிகரித்துள்ளது.
தமிழகத்தில் ஒரே நாளில் 10 ஆயிரத்து 883 பேருக்கு கொரோனா பரிசோதனை செய்யப்பட்டுள்ளது. இதுவரை 2 லட்சத்து 90 ஆயிரத்து 906 பேருக்கு பரிசோதனை செய்யப்பட்டுள்ளதாகவும், 7 ஆயிரத்து 435 பேருக்கு தொடர்ந்து சிகிச்சை அளிக்கப்பட்டு வருவதாகவும் சுகாதாரத்துறையின் அறிக்கையில் தெரிவிக்கப்பட்டுள்ளது. கொரோனா பாதிப்பு காரணமாக சிகிச்சை பெற்றுவந்த 5 பேர் பலியானதால், உயிரிழந்தவர்களின் எண்ணிக்கை 71 ஆக அதிகரித்துள்ளது.