திருச்சியில், உலக சாதனை நிகழ்ச்சியில் பங்கேற்ற 10 வயது மாணவி 3 மணி நேரம் தொடர்ந்து சிலம்பம் சுற்றி சாதனை புரிந்துள்ளார்.
தில்லைநகரில், தமிழர்களின் பாரம்பரிய கலையான சிலம்பக் கலையை ஊக்குவிக்கும் வகையில் சிலம்பத்தை அனைவரும் கற்க வேண்டும் என்ற நோக்குடன் புதிய உலக சாதனை முயற்சி முன்னெடுக்கப்பட்டது. இந்த சிலம்ப சாதனை நிகழ்ச்சியில் தமிழகம் மற்றும் பிற மாநிலங்களில் இருந்து 300க்கும் மேற்பட்ட சிலம்ப வீரர்கள் கலந்துகொண்டு ஒரு சுற்றில் 45 பேர் என்ற முறையில் சுழற்சி முறையில் 12 மணி நேரத்திற்கு சிலம்பம் சுற்றினர். இந்த உலக சாதனை நிகழ்ச்சியில் பங்கேற்ற 10 வயது மாணவி சுஜிதா 3 மணி நேரம் தொடர்ந்து சிலம்பம் சுற்றி சாதனை புரிந்தார். கம்யூனிஸ்ட் கட்சியின் மூத்த தலைவர் நல்லகண்ணு, சாதனை மாணவியை பாராட்டி உலக சாதனைக்கான சான்றிதழை வழங்கி, சிலம்பவீரர், வீராங்கனைகளை வாழ்த்தினார்.