மதுரையில் காவல் துறையினரை தாக்கி விட்டு தப்பியோட முயன்ற ரவுடிகளை, துப்பாக்கிச் சூடு நடத்தி சுற்றி வளைத்து பிடித்தனர் காவல்துறையினர்.
மதுரை மாவட்டம் மாரியம்மன் தெப்பகுளம் பகுதியில் காவல்துறையினர் இரவு வாகன சோதனையில் ஈடுபட்டிருந்தனர். அப்போது அந்த வழியே சந்தேகத்திற்கிடமாக வந்த ஆட்டோவை மடக்கி விசாரணை நடத்தியபோது, ஆட்டோவில் இருந்த மணிகண்டன் என்பவர் திடிரென தான் வைத்திருந்த ஆயுதத்தால் காவல்துறை சார்பு ஆய்வாளரை தாக்கிவிட்டு, ஆட்டோவில் இருந்த தனது கூட்டாளிகளுடன் தப்பியோட முயற்சித்துள்ளார். இதனையடுத்து, காவல்துறையினர் தற்காப்பு நடவடிக்கையாக துப்பாக்கி சூடு நடத்தி, தப்பியோட முயன்ற மணிகண்டன் மற்றும் அவருடைய நண்பர்கள் 5 பேரை சுற்றி வளைத்து கைது செய்தனர். மதுரையில் நடந்த இந்த துப்பாக்கி சூடு சம்பவம் அப்பகுதியில் பரபரப்பை ஏற்படுத்தியுள்ளது. மேலும், துப்பாக்கிச் சூடு சம்பவத்தில், யாருக்கும் காயம் ஏற்படவில்லை என காவல் துறை சார்பில் தெரிவிக்கப்பட்டுள்ளது.