அமெரிக்காவின் பிரபல நாளிதழ் வெளியிட்டுள்ள சர்வதேச விளையாட்டு அரங்கில் அதிக வருவாய் பெறும் முதல் 15 வீராங்கனைகளின் பெயர் பட்டியலில் பி.வி.சிந்து இடம்பெற்றுள்ளார்.
சம்பளம், பரிசுத் தொகை மற்றும் விளம்பரம் மூலமாக கிடைக்கும் வருமானம் உள்ளிட்டவை கணக்கிடப்பட்டுள்ளது. கடந்தாண்டு ஜூன் 1ம் தேதி முதல் இந்தாண்டு ஜூன் 1ம் தேதி வரையிலான காலகட்டம் கணக்கில் எடுக்கப்பட்டுள்ளது. இதில், இந்திய பேட்மிண்டன் நட்சத்திர வீராங்கனை பி.வி.சிந்து இடம்பெற்றுள்ளார். 39 கோடி ரூபாயுடன் அமெரிக்க டென்னிஸ் வீராங்கனை மடிசன் கீசுடன் 13-வது இடத்தை சிந்து பகிர்ந்துள்ளார்.
அமெரிக்க டென்னிஸ் வீராங்கனை செரினா வில்லியம்ஸ் முதலாவது இடத்தில் உள்ளார். இந்த பட்டியலில் இடம்பெற்ற ஒரே இந்திய வீராங்கனை பி.வி.சிந்து என்பது குறிப்பிடத்தக்கது.