இயக்குநர் லோகேஷ் கனகராஜ் இயக்கத்தில் விஜய் நடிக்கும் படம் `மாஸ்டர்’. இந்தப் படத்தில், விஜய்க்கு ஜோடியாக மாளவிகா மோகனன் நடித்துள்ளார். விஜய் சேதுபதி, ஆண்ட்ரியா, சாந்தனு, அர்ஜுன் தாஸ், நாசர் உள்ளிட்ட பலர் நடித்துள்ள இந்தப் படத்தை, சேவியர் பிரிட்டோ தயாரித்துள்ளார். ரசிகர்களிடையே பெரும் எதிர்பார்பை ஏற்படுத்தியுள்ள இப்படத்தின் சிங்கிள் ட்ராக் அண்மையில் வெளியாகி பெரும் வரவேற்பை பெற்றது. இந்நிலையில் இப்படத்தின் இசை வெளியீட்டு விழா சென்னையில் நடைபெற்றது. இசைவெளியீட்டு விழாவுக்கு நடிகர் விஜய் கோட் சூட் அணிந்து அரங்கத்துக்குள் வந்தார். இந்த புகைப்படங்கள் சில நிமிடங்களில் வெளியாகி சமூக வலைதளங்களில் வைரலானது.
இதையடுத்து, விஜயின் தந்தை எஸ்.ஏ.சந்திரசேகர் மற்றும் தாய் ஷோபா ஆகியோரும் இந்நிகழ்ச்சியில் கலந்துகொண்டனர். மேடையேறிய அவர்களை விஜய் கட்டியணைத்தார். இந்த புகைப்படங்கள் நொடிப்பொழுதில் வெளியாகி வைரலானது. நீண்டநாள்களுக்குப்பிறகு நடிகை சிம்ரன் பாடல் ஒன்றுக்கு மேடையில் நடனமாட உள்ளார். அனிருத் இசையமைத்துள்ள மாஸ்டர் படத்தின் ட்ராக் லிஸ்ட் இன்று வெளியானது.
படத்தில் அருண்ராஜா காமாராஜா, இயக்குநர் விக்ணேஷ் சிவன் உள்ளிட்டோர் படத்துக்கு பாடல்களை எழுதியுள்ளனர். குறிப்பாக, `அந்த கண்ண பாத்தாக்கா’ என்று தொடங்கும் பாடலை இசையமைப்பாளர் யுவன்சங்கர் ராஜாவும், `பொலக்கட்டும் பற பற’ என்ற பாடலை சந்தோஷ் நாராயணனும் பாடியுள்ளனர். இது தவிர, அனிருத் 3பாடல்களை பாடியுள்ளார்.