ரோகித் சர்மா அதிரடி ஆட்டத்தை தொடங்கிவிட்டால், அவரை தடுத்து நிறுத்தவே முடியாது என்று ஆஸ்திரேலிய கிரிக்கெட் வீரர் கிளென் மேக்ஸ்வெல் புகழாரம் சூட்டியுள்ளார்.
மேற்கிந்தியத் தீவுகள் அணியுடனான தொடரையடுத்து, இந்திய கிரிக்கெட் அணி, ஆஸ்திரேலியா சென்றுள்ளது. அங்கு, நான்கு டெஸ்ட் போட்டிகள், ஒரு நாள் மற்றும் டி20 தொடர்களில் விளையாட உள்ளது. தென் ஆப்பிரிக்க டெஸ்ட் தொடருக்குப் பின், இந்திய அணியில் இடம் பெறாமல் இருந்த ரோகித் சர்மா மீண்டும் டெஸ்ட் அணிக்குத் திரும்பியுள்ளார்.
இந்நிலையில், ஆஸ்திரேலிய அதிரடி வீரர் மேக்ஸ்வெல், ரோகித் சர்மா எந்த விஷயத்துக்கும் அலட்டிக்கொள்ளாத மிகவும் இயல்பான மனிதர் என்று கருத்து தெரிவித்துள்ளார். களத்தில் நிலைத்து நின்று ஆட ரோகித் சிறிது நேரம் எடுத்துக்கொண்டாலும், நிலைத்து நின்று ஆடத் தொடங்கிவிட்டால், இந்திய அணியின் வெற்றி கைக்கு அருகே வந்துவிடும் என்றும் தெரிவித்துள்ளார்.
ரோகித் சர்மா தன்னை நோக்கி வரும் பந்துகளை அனைத்து திசைகளிலும் அடித்து விளாசக்கூடியவர் என்றும், எந்த விஷயத்தையும் எளிதாக எடுத்துக்கொள்ளும் ரோகித் சர்மாவின் ஆட்டத்தை தான் ரசித்துப் பார்ப்பவன் என்று கூறியுள்ளார் மேக்ஸ்வெல். உண்மையில் ரோகித் சர்மா முழுமையான நட்சத்திர வீரர் என்றும் அவர் புகழாரம் சூட்டியுள்ளார்.
Discussion about this post