சென்னை மாநகராட்சி பள்ளிகளில் மாணவர் சேர்க்கையை அதிகரிக்க தலைமை ஆசிரியர்கள் தலைமையில் விழிப்புணர்வை ஏற்படுத்த திட்டமிடப்பட்டுள்ளது.
சென்னை மாநகராட்சி பள்ளிகளில் மாணவர் சேர்க்கையை அதிகரிக்க முடிவு எடுக்கப்பட்டுள்ளது. அதன்படி தலைமையாசிரியர்கள் தங்கள் பள்ளியைச் சுற்றியுள்ள பகுதியில் பொதுமக்களிடையே விழிப்புணர்வை ஏற்படுத்த வேண்டும் என்றும், வீடு, வீடாகச் சென்று குழந்தைகள் கணக்கெடுப்பு நடத்த வேண்டும் என்றும் அறிவுறுத்தப்பட்டுள்ளது.
மாநகராட்சி பள்ளிகளின் சிறப்பு அம்சங்களை விளக்கும் வகையில் துண்டு பிரசுரம் விநியோகிக்கவும் ஏற்பாடு செய்யப்பட்டுள்ளது. பள்ளி செல்லாத குழந்தைகள் மற்றும் இடை நிற்றல் குழந்தைகள் இருந்தால் அதுபற்றிய தகவல்களை சேகரிக்க வேண்டும் என்றும், நாளை முதல் ஒருவாரம் மாணவர் சேர்க்கை குறித்து விழிப்புணர்வை ஏற்படுத்த வேண்டும் எனவும் தலைமையாசிரியர்களுக்கு சென்னை மாநகராட்சி அறிவுறுத்தியுள்ளது.