பெண் காவலரிடம் செயின் பறித்த கொள்ளையர்கள் கைது!

சென்னையில் ஊரடங்கு நேரத்தில் பெண் காவலரிடம் செயின் பறித்த கொள்ளையர்களை சிசிடிவி காட்சிகளை வைத்து காவல்துறையினர் கைது செய்துள்ளனர். கொரட்டூர் பெண் காவலரிடம் செயின் பறிப்பில் ஈடுபட்ட மர்ம நபர்களை கைது செய்ய, தனிப்படை அமைக்கப்பட்டது. சம்பவம் நடைபெற்ற பகுதி சிசிடிவி கண்காணிப்பு கேமரா பதிவுகளை தனிப்படையினர் சோதனை செய்தனர். அதில் இருசக்கர வாகனத்தில் வந்த இரண்டு இளைஞர்கள் செயின் பறிப்பில் ஈடுபட்டது தெரியவந்தது. அவர்களை தேடி வந்த நிலையில், நேற்று மாலை கொரட்டூர் பகுதியில் வாகன சோதனையில் ஈடுபட்டிருந்த காவல்துறையினரிடம் இருவரும் சிக்கினர். இரண்டு பேரும் பல்வேறு இடங்களில் கைவரிசை காட்டியதும் தெரியவந்தது. இருசக்கர வாகனத்தை தினம் ஒரு நிறம் மாற்றி பயன்படுத்தியதும் விசாரணையில் தெரியவந்துள்ளது. இருவரையும் நீதிமன்றத்தில் ஆஜர்படுத்திய காவல்துறையினர், பின்னர் நீதிமன்ற உத்தரவுப்படி புழல் சிறையில் அடைத்தனர்.